055. EL RAHMAN

Er Rahman (mekase) 78 ajete

Me emrin e Allahut, të Gjithëmëshirshmit, Mëshirëplotit!

1. I Gjithëmëshirshmi!
2. Ai ua mësoi Kuranin.
3. Ai e krijoi njeriun.
4. Ai e mësoi të shprehet qartë.
5. Dielli dhe Hëna udhëtojnë sipas një përcaktimi të saktë.
6. Edhe yjet dhe pemët i përulen Atij.
7. Qiellin e ngriti lart dhe vendosi drejtësinë,
8. që ju të mos e shkelni atë.
9. Prandaj matni me drejtësi e mos hani në peshë!
10. Tokën e bëri për krijesat.
11. Në të ka fruta të larmishme: hurma me degët plot,
12. drithëra me gjethe e kërcej dhe rejhan.
13. Atëherë, cilën të mirë të Zotit tuaj po e mohoni?!
14. Ai e krijoi njeriun nga deltina e tharë,
15. kurse xhindët i krijoi nga flaka e zjarrit.
16. Cilën të mirë të Zotit tuaj po e mohoni?
17. Zoti i dy lindjeve dhe Zoti i dy perëndimeve!
18. Cilën të mirë të Zotit tuaj po e mohoni?
19. Ai i lejoi dy dete që të takohen,
20. mes të cilëve është një pengesë, që nuk e kapërcejnë.
21. Cilën të mirë të Zotit tuaj po e mohoni?
22. Prej atyre të dyve nxirren margaritarë e korale.
23. Cilën të mirë të Zotit tuaj po e mohoni?
24. Atij i përkasin anijet që lundrojnë në det dhe që duken si male.
25. Cilën të mirë të Zotit tuaj po e mohoni?
26. Çdo gjë që ndodhet në të ka për t’u zhdukur,
27. e do të mbetet vetëm Fytyra e Zotit tënd, që është i Madhëruar e Bujar!
28. Cilën të mirë të Zotit tuaj po e mohoni?
29. Atij i drejtohet me lutje çfarë është në qiej e në Tokë. Në çdo moment, Ai është i angazhuar me shumë çështje.
30. Cilën të mirë të Zotit tuaj po e mohoni?
31. Ne do të merremi me ju, o dy të rëndësishmit!
32. Cilën të mirë të Zotit tuaj po e mohoni?
33. O masë e xhindëve dhe e njerëzve, nëse keni mundësi të dilni përtej kufijve të qiejve e të Tokës, atëherë dilni! Por ju nuk mund ta bëni këtë, veçse me ndonjë fuqi të madhe.
34. Atëherë, cilën të mirë të Zotit tuaj po e mohoni?
35. Mbi ju të dy do të dërgohet flakë zjarri dhe tym përvëlues, e nuk do të keni mundësi të mbroheni.
36. Cilën të mirë të Zotit tuaj po e mohoni?
37. Kur qielli të çahet e të skuqet, si plumb i shkrirë.
38. Cilën të mirë të Zotit tuaj po e mohoni?
39. Atë ditë nuk pyetet për gjynahet e veta as njeriu, as xhindi.
40. Cilën të mirë të Zotit tuaj po e mohoni?
41. Keqbërësit njihen me tiparet e tyre, prandaj me forcë do të rrëmbehen për flokësh dhe për këmbësh.
42. Cilën të mirë të Zotit tuaj po e mohoni?
43. Ja, ky është Xhehenemi, të cilin keqbërësit e mohonin.
44. Ata do të sillen vërdallë ndërmjet atij dhe ujit të valuar.
45. Atëherë, cilën të mirë të Zotit tuaj po e mohoni?
46. Për atë që i është druajtur daljes para Zotit të vet, janë përgatitur dy xhenete.
47. Atëherë, cilën të mirë të Zotit tuaj po e mohoni?
48. Plot pemë, që bëjnë hije.
49. Cilën të mirë të Zotit tuaj po e mohoni?
50. Tek ata të dy ndodhen dy burime, që rrjedhin.
51. E cilën të mirë të Zotit tuaj po e mohoni?
52. Tek ata të dy, prej të gjitha frutave ka nga dy lloje.
53. E cilën të mirë të Zotit tuaj po e mohoni?
54. Ata do të jenë të mbështetur në shtroje, mbulesat e brendshme të të cilave janë prej mëndafshi të stolisur, dhe frytet e pemëve të dy xheneteve janë shumë pranë.
55. E cilën të mirë të Zotit tuaj po e mohoni?
56. Aty janë ato që i përqendrojnë shikimet e tyre e të cilat nuk i ka prekur kush më parë, as njerëz, as xhindë.
57. Cilën të mirë të Zotit tuaj po e mohoni?
58. Ato janë si rubinë e korale.
59. Atëherë, cilën të mirë të Zotit tuaj po e mohoni?
60. A nuk është shpërblimi i veprës së mirë veçse e mira?!
61. Atëherë, cilën të mirë të Zotit tuaj po e mohoni?
62. E nën ata të dy janë edhe dy kopshte të tjera.
63. Atëherë, cilën të mirë të Zotit tuaj po e mohoni?
64. Nga gjelbërimi i dendur, ato duken të mbyllura në të zi.
65. Atëherë, cilën të mirë të Zotit tuaj po e mohoni?
66. Aty janë dy burime, që gjithnjë gurgullojnë.
67. Atëherë, cilën të mirë të Zotit tuaj po e mohoni?
68. Në ata të dy, ka fruta: hurma dhe shegë.
69. Atëherë, cilën të mirë të Zotit tuaj po e mohoni?
70. Aty janë ato të mirat e të bukurat.
71. Atëherë, cilën të mirë të Zotit tuaj po e mohoni?
72. Ato janë hyri symëdha, që qëndrojnë vetëm brenda kështjellave.
73. Atëherë, cilën të mirë të Zotit tuaj po e mohoni?
74. Ato nuk i ka prekur kush më parë, as njeri e as xhind.
75. Atëherë, cilën të mirë të Zotit tuaj po e mohoni?
76. Aty rrinë të mbështetura në shtroje të gjelbra e qilima të bukur.
77. Atëherë, cilën të mirë të Zotit tuaj po e mohoni?
78. I lartësuar qoftë emri i Zotit tënd të Madhëruar e Bujar!