087. EL EA’LA

El Ea’la (mekase) 19 ajete

Me emrin e Allahut,

të Gjithëmëshirshmit, Mëshiruesit!

1. Madhëroje Zotin tënd, më të Lartësuarin,
2. i Cili krijoi dhe përsosi,
3. i Cili përcaktoi e orientoi,
4. i Cili mundëson mbirjen e kullotës,
5. e pastaj atë e bën pleh të zi.
6. Ne do ta lexojmë ty e nuk do të harrosh,
7. përveç asaj që Allahu dëshiron. Ai e di të dukshmen e të fshehtën.
8. Ne do të mundësojmë për ty më të lehtën.
9. Këshillo aty ku këshilla bën dobi!
10. Do ta pranojë këshillën ai që ka devotshmëri,
11. e do ta refuzojë atë ai që është shumë i keq,
12. i cili do të hyjë në Zjarrin e madh,
13. aty ku as nuk do të vdesë, as nuk do të jetojë.
14. Ka shpëtuar ai që është pastruar,
15. ai i cili e përkujton madhërinë e Zotit të vet dhe fal namazin.
16. Por ju po i jepni përparësi jetës së kësaj bote,
17. kur dihet se jeta e botës tjetër është më e mirë dhe e përjetshme.
18. Vërtet, kjo gjendej edhe në shkrimet e hershme,
19. në shkrimet e Ibrahimit dhe të Musait.